နား​ခံ​တော်နှင့်​ နတ်ရှင်​နောင်

Posted on
  • by
  • လင္းဦး(စိတ္ပညာ)
  • in
  • Labels: ,
  • အင်္ဂလိပ်လက်ထက် ကိုလိုနီ​ခေတ်က ပညာအလင်း​မဂ္ဂဇင်း​တွင် လယ်တီပဏ္ဍိတ ဆရာဦး​မောင်ကြီး​သည် နတ်ရှင်​နောင်အမည်ဖြင့်​ ရာဇဝင်ဝတ္ထုကြီး​တစ်ပုဒ် ​ရေး​သား​ခဲ့​၏ မဂ္ဂဇင်း​တွင် ထည့်​သွင်း​ပြီး​နောက် စာအုပ် အဖြစ်ဖြင့်​ ထုတ်​ဝေလိုက်၏။

        ကျွန်ုပ်မှာ လယ်တီပဏ္ဍိတနှင့်​ တစ်သက်လုံး​တွင် သုံး​ကြိမ်မျှသာ စကား​ပြောဖူး​သော်လည်း​ ဆရာသမား​နှင့်​ ပတ်သက်၍ သံ​ယောဇဉ်ငြိကာ ရင်း​နှီး​ခြင်း​ရှိပါသည်။ အ​ကြောင်း​မူကား​ ကျွန်ုပ်၏ ​ကျေး​ဇူး​ရှင် ​နောင်​တော်ရင်း​ ဆရာရင်း​ဖြစ်​သော ရန်ကုန်မြို့​ ဘုရား​ဖြူတိုက် “ကဝိန္ဒာဘိဝံသ ပရိယတ္တိ သာသနာ့​ဟိတ ဓမ္မာစရိယ” ပ-သ-အ(က) သီး​ခြား​စာချ၊​ မန္တ​လေး​ သကျသီဟဓမ္မာစရိယဘွဲ့​နှင့်​ “ဒုတိယ သစ္စဝါဒီ ဋီကာ-ကာရ” ​ရွှေတံဆိပ်ဆုရ၊​ ရန်ကုန်မြို့​လုံး​ဆိုင်ရာ ဓမ္မာစရိယ စာချအဖွဲ့​ကြီး​၏ ဥက္ကဌ ဆရာ​တော် ဦး​ကဝိန္ဒမှာ လယ်တီပဏ္ဍိတ ဦး​မောင်ကြီး​ ကိုး​ကွယ်​သော ဆရာ​တော်တစ်ပါး​ ဖြစ်​သော​ကြောင့်​တည်း​။ လယ်တီပဏ္ဍိတ၏ ဆရာ လယ်တီဆရာ​တော်မှာ မန္တ​လေး​ သုဒဿန ဒုတိယ စံ​ကျောင်း​၏ တပည့်​ဖြစ်၏။ ဦး​ကဝိန္ဒ၏ ငယ်ဆရာ ဝါစ္စဝါစကဋီကာသစ်နှင့်​ ဝံသ​မေဒပကာသနီကျမ်း​ပြု ဒုတိယဘုရား​ဖြူဆရာ​တော် အရှင်နန္ဒိယမှာလည်း​ မန္တ​လေး​ သုဒဿနာ ဒုတိယစံ​ကျောင်း​၏ တပည့်​ပင် ဖြစ်၍ အနွယ်ချင်း​ တူရကား​ ဦး​မောင်ကြီး​က အထူး​လေး​မြတ် ကြည်ညိုခဲ့​ပေသည်။ (ထိုဆရာ​တော် ဦး​ကဝိန္ဒမှာ ၁၂၉၅ ခုနှစ်က ပျံလွန်​တော်မူခဲ့​ရှာ​လေပြီ။)

        ကျွန်ုပ်မှာ လယ်တီပဏ္ဍိတထံ၌ တစ်မိနစ်ခန့်​မျှ နည်း​ခံ၍ မသင်ကြား​ခဲ့​ဖူး​သော်လည်း​ သူ၏ စာ​ပေ၊​ ကျမ်း​စာ၊​ ဝတ္ထုများ​ကိုမူ အထူး​နှစ်ခြိုက်၍ စာပိုဒ်များ​ကို အာဂုံပင် ​ဆောင်ထား​ခဲ့​ဖူး​ရာ နတ်ရှင်​နောင် ဝတ္ထုမှာမူ ကျွန်ုပ်၏ အသည်း​စွဲဖြစ်ပါသည်။ ထိုအခါက နတ်ရှင်​နောင် ဝတ္ထုကို စွဲလမ်း​မူး​ရူး​သူတို့​တွင် ကျွန်ုပ်မှာ ထိပ်တန်း​က ပါဝင်ခဲ့​ပါသည်။ ကျွန်ုပ်ကိုယ်တိုင် ရာဇဝင်ဝတ္ထု​ရေး​ဆရာ ဖြစ်လာခဲ့​သည်မှာ နတ်ရှင်​နောင်ဝတ္ထုကို အ​ခြေပြု၍ နည်း​ဥပ​ဒေသ ယူငင်​ရေး​သား​ခြင်း​ကြောင့်​ ဖြစ်လာရသည်ဆိုလျှင် လွဲမည် မဟုတ်ပါ။ သို့​ဖြစ်၍ နတ်ရှင်​နောင်ဝတ္ထု သို့​မဟုတ် လယ်တီပဏ္ဍိတကို ကျွန်ုပ်၏ ​ကျေး​ဇူး​ရှင်ဆရာ တစ်ဦး​ဟုပင် မှတ်ယူပါသည်။

        ကျွန်ုပ်၏ “နား​ခံ​တော်”ဝတ္ထု သူရိယရုပ်စုံသတင်း​စာ၌ ပါပြီး​နောက် ဂိမှာနဥတု ဖဂ္ဂုနမာသ တ​ပေါင်း​လအတွင်း​ တစ်​နေ့​သ၌ ရန်ကုန်မြို့​ အ​ရှေ့​ပိုင်း​ ၅၃ လမ်း​ရှိ တိုက်ခန်း​တွင် ဆရာဦး​မောင်ကြီး​နှင့်​ ​တွေ့​ရာ “သူရိယရုပ်စုံသတင်း​စာမှ ပူတ​ကေနှင့်​ နား​ခံ​တော်ဝတ္ထု​ရေး​သူ မည်သူဖြစ်​ကြောင်း​ သိလို​ကြောင်း​” နှင့်​ ​မေး​မြန်း​၏။ (ကျွန်ုပ်နှင့်​ သူရိယတိုက် အဆက် ဖြစ်​နေသည်ကို ဦး​မောင်ကြီး​က သိထား​ရင်း​စွဲဖြစ်၍ ​မေး​မြန်း​ခြင်း​ဖြစ်၏)

    “ ဘာလုပ်မလို့​လဲ ဆရာ”

        “ သိချင်လို့​ပေါ့​ ကိုယ်​တော်”

        (ထိုအခါ ကျွန်ုပ်သည် ရဟန်း​ဘဝနှင့်​ဖြစ်၏ နား​ခံ​တော်ဝတ္ထုမှာ မန္တ​လေး​ သကျသီဟ စာချတန်း​ ဝင်​နေစဉ်က ​ရေး​ခဲ့​သော ဝတ္ထုဖြစ်ရာ ကျွန်ုပ်၏ ပထမဆုံး​ရေး​သော ဝတ္ထုလည်း​ဖြစ်၏။)

        “သိချင်ရင် ကျုပ်ပဲ”

        “ဟာ …. မဟုတ်တာ၊​ ကိုယ်​တော် ဝတ္ထု​ရေး​တတ်သလား​၊​ စကျာသီဟသမား​ (သကျသီဟ စာ​မေး​ပွဲ ဆိုလို၏။) တစ်ဦး​က သည်ဝတ္ထုမျိုး​ ​ရေး​တယ်ဆိုတာ မဖြစ်နိုင်ပါဘူး​”
    ထို့​နောက် ကျွန်ုပ်က ယုံကြည်​လောက်​အောင် ​ပြောဆိုမှ အံ့​အား​သင့်​စွာ အတန်ကြာ ​ငေး​နေပြီး​ -

    “ကိုယ်​တော်က တပည့်​တော်ကို သတ်လိုက်တာ​ပေါ့​” ဟု လွှတ်ခနဲ့​ ​ပြောလိုက်ပါသည်။

    “ ဘယ်လိုလဲ ဆရာ”

    “ဟာ… တပည့်​တော်က နတ်ရှင်​နောင်ကို အမွှန်း​တင် ​ရေး​ထား​တာ၊​ ကိုယ်​တော်က နတ်ရှင်​နောင် စစ်ရှံုး​တာ​တွေ၊​ လိမ်လည်​ကောက်ကျစ်တာ​တွေ၊​ ခရစ်ယာန်ထဲ ဝင်တာ​တွေ ​ရေး​ထား​တော့​ နတ်ရှင်​နောင်ကို အထင်​သေး​ကုန်တာ​ပေါ့​”

    “ ဦး​ပဥ္ဇင်း​က​တော့​ မှန်တာပဲ ​ရေး​တာပဲ၊​ ​ပေါ်တူဂီ ရာဇဝင်မှာလည်း​ သည်အတိုင်း​ပါတယ်၊​ မှတ်တမ်း​တွေလည်း​ ရှိတယ်၊​ မှန်နန်း​မှာလည်း​ အရိပ်အမြွက် အပါသား​ပဲ ဆရာ”
    “ဒါက​တော့​ ဟုတ်တာ​ပေါ့​၊​ သို့​ပေမယ့်​ မှန်တိုင်း​ရေး​ရင် ဘယ်​ကောင်း​မလဲ၊​ ကိုယ့်​အမျိုး​သား​ ဘုရင်ကို နိုင်ငံခြား​သား​တွေ အထင်​သေး​ကုန်မှာ​ပေါ့​”

    “ ​နေပါဦး​ဆရာ၊​ နတ်ရှင်​နောင်ဝတ္ထုကို ဦး​ပဥ္ဇင်း​လည်း​ သိပ်စွဲတာပဲ၊​ သို့​ပေမယ့်​ ရာဇဝင်နှင့်​ တိုက်ကြည့်​တော့​ မကိုက်တဲ့​အချက်​တွေ ပါ​နေတယ်၊​ ဥပမာ…. အိမ်​ရှေ့​မင်း​ ထိုင်း​စစ်ပွဲမှာ ဆုံး​ရတာ နတ်ရှင်​နောင်ရဲ့​ လုပ်ကြံချက် ပ​ယောဂ​ကြောင့်​ ဆုံး​သလို ဆရာက ​ရေး​ထား​တယ်၊​ ရာဇဝင် အ​စောင်​စောင်မှာ အရိပ်အမြွက်​တောင် ရှာမ​တွေ့​ဘူး​၊​ ဆရာ့​မှာ မှတ်တမ်း​များ​ ရထား​သလား​”
    “ ဝတ္ထု​ရေး​တာ ဘယ်က မှတ်တမ်း​ရ​နေမှာလဲ ကိုယ်​တော်ရဲ့​၊​ ဖတ်​ကောင်း​အောင် ​ရေး​ရတာ​ပေါ့​”

    “ဆရာဝတ္ထု​ရေး​တာ အခန်း​ထဲက စား​ပွဲမှာထိုင်ပြီး​ စိတ်ကူး​ဉာဏ်နဲ့​ချည်း​ ​ရေး​နေတယ်ထင်တယ်”

    “ စား​ပွဲမှာ ထိုင်ပြီး​ စိတ်ကူး​ဉာဏ်နဲ့​ မ​ရေး​လို့​ ဘယ်လို​ရေး​ရမလဲ ကိုယ်​တော်”

    “မှတ်စု မှတ်တမ်း​တွေ ရ​အောင်ရှာ၊​ ဇာတ်လမ်း​နဲ့​ ပတ်သက်တဲ့​ ဌာန​တွေ ကိုယ်တိုင်သွား​ကြည့်​၊​ စပ်ဆိုင်ရာ သိမီလိုက်သူ​တွေဆီ သွား​ရောက်စုံစမ်း​ပြီး​ ​ရေး​ဖို့​ကောင်း​တာလို့​ ​ပြောတာပါ”

    “ ဟဲဟဲ… ​နေပူလိုက်တာ ကိုယ်​တော်၊​ သည်​လောက်ဒုက္ခမခံနိုင်ပါဘူး​၊​ ဝတ္ထု​ရေး​တာပဲ၊​ ရာဇဝင်​ရေး​တာမှ မဟုတ်ဘဲ၊​ တပည့်​တော်​တော့​ ရာဇဝင်ကြည့်​ပြီး​ စိတ်ကူး​ဉာဏ်နဲ့​ပဲ ​ရေး​နေတာဘဲ၊​ ကိုယ်​တော်လို သန်လျင်တို့​…. အင်း​ဝတို့​…. ဟိုသွား​ သည်သွား​ သွား​ပြီး​တော့​ဖြင့်​ မ​ရေး​နိုင်ဘူး​”

    “ ဟုတ်တယ်၊​ ဦး​ပဥ္ဇင်း​တော့​ ကိုယ်တိုင်သွား​ကြည့်​ပြီး​မှ ​ရေး​လို့​ အား​ရတယ်၊​ နား​ခံ​တော်တုန်း​က ဆိုရင် အင်မတန် ပင်ပန်း​တာဘဲ၊​ လွှတ်​တော်မှတ်တမ်း​တွေဆိုလည်း​ ပုဂံဦး​တင်ဆီက မရအရ ဆွဲယူရတယ်”

    “ကိုယ်​တော် ​တော်​တော်အပင်ပန်း​ ခံနိုင်ပါတယ်၊​ ကိုယ်​တော့်​ဝတ္ထုကြည့်​တာနဲ့​ပဲ လုံ့​လ ဝီရိယ ဘယ်​လောက်ရှိတယ်ဆိုတာ သိနိုင်တယ်”
    ဤကား​ ကျွန်ုပ် ရာဇဝင် ဝတ္ထု​ရေး​ဆရာဖြစ်ခဲ့​ရပုံနှင့်​ “နား​ခံ​တော်” ဝတ္ထုအတွက် ကျွန်ုပ်၏ ဆရာတစ်ဆူ မှတ်ယူခြင်း​ခံရ​သော လယ်တီပဏ္ဍိတ ဦး​မောင်ကြီး​၏ မှတ်ချက်ချခြင်း​ ခံရပုံဖြစ်​ပေသည်။

    စိုး​မြင့်​ (​ရွှေစကြာ)
                                    ခွဲထား​ကျော်၊​ ဂဏ္ဍိကျမ်း​ဆရာ

    0 comments:

    Post a Comment

    ကဗျာဆရာ
    အသပြာနတ္တိ
    ဈေးထဲမှာ မုန့်လုပ်ရောင်း
    ၀မ်းကျောင်းနေ၏.......။
    လင်းဦး(စိတ်ပညာ)


    Twitter

     
    Copyright (c) 2010 Myanmar Blogger byLin Oo